بسبب عمرو دياب.. هجوم شديد من تامر عاشور على عمرو مصطفى

هاجم المطرب المصري تامر عاشور، الملحن عمرو مصطفى، بعد ما صدر من الأخير من هجوم على عديد من نجوم الوسط الغنائي العربي، خلال استضافته، أمس، ببرنامج «حبر سري»، على فضائية القاهرة والناس، في ضيافة الإعلامية أسما إبراهيم.

ونشر تامر عاشور على حسابه بموقع التواصل الاجتماعي "فيس بوك"، منشورا قال فيه: «النجاح يعني أعمال مش كتر كلام وأقول هعمل وأسوي وعايش أتريق على ده وده بقالي سنين التاريخ جميل مفيش شك بس بيعتمد على الوقت يعني نقيم اللي شغالين دلوقتي لما يقعدوا نفس الزمن اللي أنت قعدته ونشوف، لكن تقييم دلوقتي اسمه جهل بالتاريخ».

وأضاف: «أ ب، ملحن يعني لازم مطرب يغني اللحن ده وإلا مكنتش هتبقى ملحن المطرب الأول ينجح بعد كده الملحن ينجح طبعا مفيش كلام والملحن في حتته والمطرب في حتته كل نجاح مختلف عن التاني».

ودفاعًا عن زملائه الملحنين، قال تامر عاشور: «نادر عبد الله أعماله كلها ناجحة وشاعر كبير قوي قوي قوي كلامه تقيل كلامه خفيف نبقى نوزن ونشوف لكن نبذة عن أعمال نادر الثقيلة "أواخر الشتا" إليسا، "تسلم"، "كلموها عني"، "آخر مقابلة"، "تصدق بمين "إليسا، "بطمنك"، "أخيرا اتجرأت" شيرين عبد الوهاب، "ريحة الحبايب"، "خلينا نشوفك" عمرو دياب، واضرب في 200 على نفس المستوى بس البوست مش هيكفي تاريخه، بس هو مش بتاع بروبجاندا، ومحمد رحيم مش محتاج حد يفرحه أكيد ده بابا يا عمورة دراسة ومزيكا وحاجة تشرف يعني وتعطل قدامه جداً بمعمل الكيميا اللي بتتكلم عنه ده، وإلهامي دهيمه موزع أغنية "قولوله سماح" فنان كبير هو وأدهم أخوه».

عمرو دياب وعمرو مصطفى

أما عن الهضبة عمرو دياب، فقال تامر عاشور: «مش هاجيب سيرة عمرو دياب كتير بس هو الڤاترينه اللي قدمتك للناس بـ"خليك فاكرني" سنة 99 يعني كان عندك 13 سنة حسب كلامك مع الإعلامية أسما إبراهيم، مش عامر منيب اللي قدمك عامر فعلاً ليه فضل على كل الناس وأنا منهم بس مش هو اللي قدمك متزييفش التاريخ اللي عمال تتمسك فيه، ونعمل سيرش على كل اسم من دول نلاقي أعمال تخض وتاريخ يزعلك شخصياً مش برامج وتخبيط وهخليهم يعتزلوا ومحدش بينجح والكلام العجيب ده وفي الآخر تقولي مصر!! ما تطلع تتكلم كويس على فنانين مصر طيب، وقصة نبضات القلب بتاعت الأغاني دي بلح، وهنغير الذوق العام هتغير الذوق العام بـأيه هتغير الذوق العام وماله أصلًا الذوق العام، هو علشان بقى فى حاجات بتنجح مش أنت اللي عاملها بقى الذوق وحش!».

وأنهى تامر عاشور هجومه على عمرو مصطفى قائلًا:«بالتخبيط في ناس تاريخ ووجه مصر حقيقي هتغير الذوق العام!! روح أدي أغنية "العالم الله دي" لأي حد غير عمرو دياب مكانتش هتوصل للعالمية اللي أنت فرحان بيها هي أغنية "تملي معاك" محققتش عالمية؟ أكتر أغنية لعمرو دياب وصلت للعالمية هي "تملي معاك" ألحان "شريف تاج" مش ألحانك كلمات أحمد علي موسى، السر في عمرو دياب صدقني والدليل أن كل أغانيك مع أي حد غير عمرو زيها زي باقي الأغاني ولا راحت عالمية ولا حاجة ود مينقصش من فنك ولا موهبتك ومش عيب إحنا ثقافة وجمهور كبير والعالم كله بيجي دلوقتي يعمل في عالمنا أغاني وحفلات "متستقلش" وكلامي على عمرو مصطفى».

الجدير بالذكر أن عمرو مصطفى هاجم عمرو دياب،معلنًا أنه قام بمحوه من تاريخه وكان «البلوك» جزاء الأخير من الأول، كما أنه هاجم عدد كبير من نجوم الوسط الغنائي المصري والعربي.